Hvað er Félagsfræði?

Félagsfræði Greinin er kennd til BA-prófs, diplóma-prófs, MA-prófs og doktorsprófs við Háskóla Íslands.

Líttu í kringum þig – hvað sérðu? Einstaklinga – hópa – fjölskyldur – þéttbýli – strálbýli – skólafélaga – menntun – atvinnulíf – íþróttir – stjórnmál – fjölmiðla – afbrot …Nútímasamfélagið er flókið, margbrotið og sífelldum breytingum undirorpið. Öll þekkjum við félagslegt umhverfi okkar, en samt skiljum við það oft illa. Félagsfræðingar fást við að varpa ljósi á undirstöður samfélagsins og efla skilning á einstökum þáttum þess. Þeir, sem leggja stund á félagsfræðinám við Háskóla Íslands öðlast þjálfun og færni í öflun og meðferð margvíslegra upplýsinga, sem eru kostir sem mikil þörf er á í upplýsinga- og þjónustusamfélagi nútímans. Hagnýting gagna er ómissandi þáttur í samfélaginu og félagsfræðin veitir nemendum færni í framsetningu og þjálfun í túlkun þeirra. Rík áhersla er lögð á sjálfstæð vinnubrögð og eigið frumkvæði nemenda, auk tjáningarhæfileika og samskiptahæfni. Félagsfræði er fræðigrein sem greinir undirstöður þjóðfélagsins og eflir skilning á ólíkum sviðum þess. Meðal viðfangsefna félagsfræðinnar má nefna velferðarmál, lífskjör og lagskiptingu, afbrot, atvinnu- og efnahagslíf, fjölmiðla, stöðu kynjanna, innflytjendamál, unglingsárin, heilbrigði og lýðheilsu, fjölskyldumál, mannfjöldaþróun og vísindastarf. Nám í félagsfræði felur í sér undirstöðuþjálfun í fræðilegri hugsun og fræðilegum vinnubrögðum. Jafnframt er lögð áhersla á sjálfstæði og frumkvæði nemenda. Við hvað starfa félagsfræðingar? Félagsfræðingar starfa við opinbera stjórnsýslu, félagsþjónustu, tómstunda-, menningar- og íþróttastarfsemi, fræðslu, fjármála- og tryggingastarfsemi, rannsóknir og ráðgjöf. Þeir vinna jafnt hjá hinu opinbera og á einkamarkaði og kannanir hafa sýnt að langflestir telja nám sitt í félagsfræði nýtast vel í starfi.